Pas 11 ditë luftimesh të ashpra që shkaktuan mbi 100 viktima, lanë pas shkatërrime masive në Rripin e Gazës, e bllokuan aktivitetet në pjesën më të madhe të Izraelit, qeveria e Izraelit dhe palestinezët militantë në Rripin e Gazës arritën armëpushimin, duke ndjekur kështu një propozim të Egjiptit, që po ndërmjetëson mes palëve në konflikt. Pushimzjarri u vendos pa asnjë kusht paraprak, tha një zëdhënës i kryeministrit izraelit, Benjamin Netanjahu pas një mbledhjeje të kabinetit të sigurisë të enjten (20.05) në mbrëmje, por nëse palestinezët i vazhdojnë sulmet e tyre me raketa armëpushimi shfuqizohet menjëherë.Edhe Hamasi radikal e pranoi marrëveshjen. të traumatizuar nga dhuna e këtyre ditëve, paklestinezët vërshuan në rrugët e Gazës të festonin lajmin e armëpushimit. „Armëpushimi hyri në fuqi për të dyja palët të premten (21.05) në orën 02:00 sipas orës lokale", vuri në dukje Taher al-Nuno, një këshilltar u kreut të Hamasit Ismail Hanija, në Gaza. „Rezistenca e armatosur" e palestinezëve do të vazhdojë derisa këtë do ta bëjë pala izraelite, shtoi ai.Gjatë ditëve të fundit disa shtete – ndër to edhe Gjermania – janë përpjekur që t'u jepet fund sulmeve nga ajri. Presidenti i SHBA-së Joe Biden në një telefonatë me Netanjahun bëri thirrje për çtensionim të menjëhershëm të situates dhe e përshëndeti vendosjen e pushimzjarrit. Të enjten ministri i Jashtëm gjerman Heiko Maas zhvilloi bisedime me të dyja palët në Lindjen e Mesme. Ashtu si tre luftërat e mëparshme midis dy armiqve të hidhur, raundi i fundit i luftimeve përfundoi pa ndonjë zgjidhje të konfliktit. Izraeli pretendoi se u ka shktatuar dëme të mëdha Hamasit, por përsëri nuk ishte në gjendje të ndalonte breshëritë e raketave të grupit militant islamik. Hamasi gjithashtu pretendoi fitoren. Por tani përballet me sfidën e madhe të rindërtimit në një territor tashmë që vuan nga varfëria, niveli i lartë i papunësisë dhe përhapja e koronavirusit.