Një 39-vjeccar nga Shijaku që u konfliktua me një të re spanjolle në fillim të këtij muaji është arrestuar nën akuzën e shfrytëzimit të prostitucionit të 5 shtetaseve të huaja, të moshave 23-47 vjecc, në Durrës. Në vijim të hetimeve të thelluara për të vënë para përgjegjësisë penale personat e përfshirë në një rast prostitucioni, të goditur nga policia më 6 mars, u vu në pranga 39-vjeçari Ismet Zoto. Ai u konfliktua me 23-vjeçaren nga Barcelona brenda apartamentit që spanjollja dhe 4 shoqe të saj nga Venezuela, Spanja dhe Kolumbia kishin marrë me qira në qendër të Durrësit. 39-vjeccari që pas incidentit deklaroi se ishin konfliktuar për motive krejt banale u arrestua nën akuzën se i shfrytëzonte për prostitucion, këto shtetase në apartamentin, ku gjithashtu konsumoheshin dhe lëndë narkotike. Pas hetimeve të para, u proceduan penalisht në gjendje të lirë 5 shtetaset e huaja për ushtrim prostitucioni, ndërsa 20 ditë më pas specialistët e antitrafikut në policinë e Durrësit ekzekutuan urdhrin e prokurorisë, për ndalimin e 39- vjeçarit me banim në Shijak. Ndaj tij është caktuar masa e sigurisë “arrest në burg”, për veprën penale “shfrytëzimi i prostitucionit”.