Pas deklaratës së ministrit të Punëve të Brendshme të Kosovës Xhelal Sveçla për operacionin e suksesshëm në bastisjet në Shtërpcë, Ferizaj dhe në Prishtinë, që u mbyll me 10 të arrestuar, reagoi kryeprokurori i shtetit Aleksandër Lumezi, duke e vlerësuar si ndërhyrje në punët e brendshme të institucionit të pavarur të prokurorisë, dhe duke e parë si pengesë në kryerjen e detyrave zyrtare, thonë mediat në Prishtinë. Ato theksojnë se reagimi i kryeprokurorit u pasua me një deklaratë të ministres së Drejtësisë Albulena Haxhiu, e cila vlerësoi se pa punën e Ministrisë së Brendshme, prokuroria do të kishte vazhduar heshtjen. “Pse nuk vepruan më herët kur ish zyrtarë të lartë duke nisur nga ish-presidentë, ish-kryeministra e ish-ministra dhe udhëheqës të institucioneve shumë të rëndësishme në vend ndërtuan vila në Brezovicë?”, u shpreh ajo. Shtypi vendas citon burime të pohojnë se hetimet e do të vazhdojnë, e në shënjester të tyre pritet të jenë edhe: ish-drejtorë të policisë, ish-deputetë e deputetë, ish-ministra, ish-kryeministra e madje dhe ish-presidentët që ndërtuan vila pa leje apo këtë e bën me ‘dhurata’ apo “promovime”. Sipas një njoftimi të SHBA-së, amerikanët tashmë kanë përgatitur një plan të ri veprimi për luftën kundër krimit të organizuar, korrupsionit apo trafikimit në rajonin e Ballkanit. Për këtë qëllim, një Këshilltar i Përhershëm Ligjor do të caktohet në Ambasadën Amerikane në Zagreb dhe do të punojë në partneritet të ngushtë me Ministrinë e Drejtësisë së Kroacisë.