Të paktën 16 cisterna nafte të prekura nga sanksionet e SHBA-së kanë tentuar sipas New York Times, t’i shmangen bllokadës detare që Washingtoni ka vendosur ndaj eksporteve energjetike të Venezuelës. Anijet në fjalë kanë tentuar të fshehin vendndodhjet e tyre të vërteta osetë fikin sinjalet e transmetimit. Për javë të tëra, anijet sipas gazetaës prestigjoze, ishin parë në imazhet satelitore teksa qëndronin të ankoruara në porte venezueliane. Megjithatë të shtunën, pas kapjes së presidentit Nicolás Maduro nga forcat amerikane, të gjitha qenë larguar nga ato vende. Katër prej tyre janë ndjekur nga satelitët duke lundruar në lindje me emra të rremë e duke dhënë koordinata të gabuara të pozicioneve të tyre, një taktikë mashtruese kjo e njohur si “spoofing”. Katër anijet janë larguar nga porti pa autorizimin e qeverisë së përkohshme, sipas komunikimeve të brendshme të kompanisë shtetërore venezueliane të naftës dhe dy personave nga industria e naftës në Venezuelë, të cilët folën në kushte anonimiteti nga frika e hakmarrjes. Largimi i cisternave, mund të shihet sipas New York Times si një akt sfide edhe ndaj vetë kontrollit të kryetares së përkohshme të shtetit, Delcy Rodríguez. 12 të tjerat nuk po transmetojnë asnjë sinjal dhe nuk janë lokalizuar në imazhe të reja. Presidenti Trump vendosi në mënyrë të njëanshme një “bllokadë të plotë” ndaj cisternave venezueliane të naftës të sanksionuara më 16 dhjetor, një përpjekje kjo të cilën Sekretari i Shtetit Marco Rubio e përshkroi si një nga karantinat detare më të mëdha në historinë modern, që sipas tij, “paralizonte” me sukses aftësinë e regjimit për të gjeneruar të ardhura.