Gjigandi amerikan i teknologjisë, Apple është akuzuar për shkelje të rregullave të konkurrencës në Bashkimin Evropian, për shkak të mënyrës si menaxhon platformën online të aplikacioneve (App Store). Zyrtarja e Komisionit Evropian për çështjet e konkurrencës, Margrethe Vestager shkroi në Tëitter se “konsumatorët janë duke humbur”. Komenti i saj lidhet me pretendimet e ngritura dy vjet më parë nga aplikacioni i muzikës Spotify i cili thoshte se Apple po mbyste inovacionin. Kompania përballet tani me një gjobë të rëndë dhe nëse nuk arrin t`i bindë rregullatorët, mund të detyrohet të ndryshojë politikat e saj. Mes tjerash është përmendur fakti se praktika e Apple është duke shtyrë krijuesit e aplikaconeve që shesin përmbajtje digjitale, të përdorin një sistem pagese, i cili mban një tarifë prej 30 për qind. Hetimi i BE-së, i kryer pas ankesës së Spotity, del në përfundimin se shpezimet shtesë po rëndojnë mbi konsumatorët. “Gjetjet tona paraprake tregojnë se Apple kontrollon përdoruesit e pajsjeve iPhone dhe iPad përmes App Store”, tha Vestager.“Nëpërmjet rregullave të ashpra, që dëmtojnë shërbimet konkurruese, Apple nuk u lejon përdoresuesve që të kenë qasje në zgjedhjen e muzikës dhe kështu dëmton konkurrencën”, vazhdoi ajo. Sipas Ligjit të BE-së për konkurrencë, kompanitë mund të gjobiten me një përqindje të fitimeve të tyre vjetore, në rast se vërehen shkelje, që në këtë rast për Apple mund të nënkuptojë miliarda euro.