Mediat kryesore në Itali raportuan këtë të hënë se nga 41 emigrantët e vendosur në kampin e Gjadrit në Lezhë, kanë mbetur vetëm 25, duke ngritur dyshime për zhdukjen e 16 emigrantëve. “Nuk dihet nëse 16 emigrantë janë rikthyer në Itali në pritje të riatdhesimit apo janë në dhoma izolimi, për shkak të revoltës që ata bënë brenda kampit pak javë më parë, duke thyer xhama e orendi, e ku dy prej tyre mbetën të plagosur lehtë me thikë”, raportojnë mediat italiane. Lidhur me zhdukjen e 16 emigrantëve, mediat në Itali i referohen eurodeputetes Cecilia Strada dhe deputetes së Partisë Demokratike në vendin fqinj, Rachele Scarpa, të cilat kryen një inspektim të ri në kampin e Gjadrit, fundjavën e kaluar. “Pamja që shfaqet, shpjeguan eurodeputetja Cecilia Strada dhe deputetja Rachele Scarpa, është e “një strukture krejtësisht e papërshtatshme” dhe një heshtjeje shqetësuese institucionale. Po ashtu, shtypi citon dhe avokaten Rosa Guerra, e cila është shprehur se “Shkova për intervistë dhe klienti im nuk ishte. Nga 41 personat e transferuar në Shqipëri dy javë më parë, 25 janë aty. Ku janë 16 të tjerët? Nuk është dhënë asnjë informacion zyrtar në përgjigje të pyetjeve tona”.