Gjykata e Vlorës la në burg Orest Çorapajn dhe Julian Zogajn, të akuzuar për pengmarrjen e një shtetasi të Kosovës dhe liroi Vilson Agajn. Tre të rinjtë u arrestuan më 12 dhjetor pasi prej 2 javësh mbanin peng në një apartament dhe dhunonin 39-vjeçarin Fisnik Xhaka, për t’i marrë 70 mijë euro. Sipas Policisë, ngjarja lidhet me një borxh të pashlyer, por një video e publikuar së fundmi nga pala mbrojtëse lehtësoi masën për njërin prej të arrestuarve. Ne video shfaqet i riu nga Kosova së bashku me personat e arrestuar. Në pamje, ata duken duke drekuar së bashku dhe duke komunikuar në mënyrë të qetë. Edhe pse në pamjet filmike nuk dallohet qartë data dhe ora e regjistrimit, videot tregojnë se personat komunikojnë lirshëm dhe duken të njohur mes tyre. Sipas avokatëve, i riu u kërkonte para familjarëve për të shlyer një borxh, për të cilin kishte dalë garant, dhe se rasti është keqinterpretuar si pengmarrje. Por pavarësisht pretendimeve të mbrojtjes gjykata i la në burg dy prej të akuzuarve deri në përfundim të hetimeve dhe zbardhjen e plotë të rrethanave të ngjarjes.