Një vajzë 14 vjeçe, që u vetëvra 7 vite më parë në Uells, sipas hetimeve të përfunduara së fundi, ndërmori aktin ekstrem pasi ishte përballur me bullizim në rrjetet sociale. Megan Evans u gjet e vdekur në dhomën e saj të gjumit pas sulmeve verbale të dashakeqësve që kishin krijuar “grupe urrejtjeje në rrjet” ndaj saj, para se të denoncoheshin dhe të fshiheshin nga rrjeti, tha nëna e vajzës. Në seancën dëgjimore u tha se disa grupe urrejtjeje ishin krijuar kundër saj në rrjetet Snapchat e Facebook. Sipas hetimeve, Megan kishte pasur “shpërthime” emocionale në klasë para vetëvrasjes në 2017 por shkolla nuk e trajtoi asnjëherë si problem edhe pse me herët ajo ishte nje nxënëse shembullore. “Ata e dinin se Megan nuk ishte më vetvetja, e dinin se sjellja e saj ishte jashtë karakteri dhe po përkeqësohej, por prindërit nuk u njoftuan”, shton më tej e ëma e viktimës. Pas vdekjes së Megan, nëna e saj Nicola ka punuar për të rritur ndërgjegjësimin ndaj shëndetit mendor që po përkeqësohet te fëmijët e adoleshentët, si dhe rreziqet e bullizimit online. Ajo madje ka krijuar një fondacion për konsultime falas për të rinjtë.