Skënder Hitaj në protestën e tij të parë kombëtare në krye të Policisë së Shtetit për demokratët kaloi vijën e kuqe. Ndryshe homologu i tij, Ilir Proda, që u shkarkua pikërisht me pretekstin e dështimit në protestat e kaluara, Hitaj zgjodhi të mos ishte indiferent me asnjë episod apo hedhësit e mjeteve piroteknike. Hitaj zbriti vetë në terren dhe dha porosi të forta për efektivët e policisë, një prej tyre ishte dhe fakti se nuk do të kishte tolerime, madje kundërpërgjigjja e efektivëve do të ishte më e fortë. Në gadishmëri ishin dhe forcat RENEA nëse përshkallëzohej situata. Nga radhët e protestuesve pati më shumë të lënduar dhe për shkak të përdorimit të gazit lotsjellës, apo sprajit nga efektivët. Deputetët e Partisë Demokratike, Luçiano Boçi, Klevis Balliu dhe Aulon Kalaja ishin ndër më të dëmtuarit. Ky i fundit është detyruar të transportohet me ambulancë në spital duke u mbajtur nga protestuesit, pasi ishte i shtrirë në rrugë. Sali Berisha vizitoi të lënduarit në spitalin e traumës, madje pati dhe akuza të ashpra dhe për drejtuesin e ri të uniformave blu dhe mjetet e përdorura nga policët. Ndërkohë që reaguan dhe eksponentë të tjerë të PD në lidhje me ashpërsinë e përdorur nga opozita. Ditën e sotme janë dhënë dhe masat në lidhje me protestuesit dhe bëhet me dije se 5 persona janë lënë në burg, ndërsa 6 të tjerë me detyrim paraqitjeje nga simpatizantët e PD-ës.