Përgatitjet për natën e ndërrimit të viteve mesa duket po fokusohen vetëm te gatimet për darkën dhe jo te kujdesi ndaj vetes. Parukeritë nuk kanë punën e fundviteve të shkuara , për sa kohë nuk do të ketë organizime të festave jashtë shtëpisë. “Vitet e tjera salloni ishte plot, por ka ndikuar pandemi, oraret kufizuese dhe s’ka rezervime. Punën si ditë të fundit të vitit do e mbyllim që në 7 se në 8:30 duhet të jemi në shtëpi”, shprehet një parukiere. Zonjat dhe të rejat shkojnë në sallonet e bukurisë për t’u rregulluar si në ditët e zakonshme të vitit, jo për make up-in festiv me mbizotërimin e ngjyrës së kuqe. “Sot pata kohë se e kisha pushim dhe lyeva pak flokët, por jo ndonjë rregullim për festa… s’kemi ku të shkojmë, as me kolektivin e punës nuk organizuam festë, në shtëpi”, tregon një kliente.