Astronautët e anijes kozmike Artemis hynë në fazën e fundit të rrugëtimit të tyre drejtë Hënës. Graviteti i Hënës tani , sipas NASA-s, po ushtron një tërheqje më të fortë mbi anijen kozmike sesa ajo e Tokës. Kapsula Orion tani do të rrotullohet rreth Hënës, duke i mundësuar ekuipazhit të udhëtojë shumë më larg nga planeti ynë sesa çdo njeri më parë. Astronautët hynë në atë që NASA e quan sfera e ndikimit hënor dhe së shpejti do të regjistrojnë fluturimin e parë hënor që nga viti 1972. Ndërsa hynë në ndikimin gravitacional të Hënës, ekuipazhi ishte rreth 39,000 milje larg Hënës dhe rreth 232,000 milje nga Toka, tha një zyrtar i NASA-s në transmetimin e drejtpërdrejtë të ngjarjes nga agjencia. Ky rast historik vjen njëkohësisht me një numër të madh risish dhe për ekuipazhin që përbëhet prej tre amerikanësh dhe një kanadez. Victor Glover do të hyjë në histori si personi i parë me ngjyrë që fluturoi ndonjëherë rreth Hënës, dhe Christina Koch do të jetë gruaja e parë. Ndërkohë, kanadezi Jeremy Hansen do të bëhet jo-amerikani i parë që e arrin këtë sukses. Ata të tre, së bashku me komandantin e misionit Reid Ëiseman, do ta kalojnë pjesën më të madhe të fluturimit të tyre pranë Hënës duke dokumentuar Hënën. Astronautët kanë filluar të shohin tashmë tipare të trupit qiellor që nuk janë parë kurrë më parë me sy të zhveshur njerëzor. Në orët e para të së dielës, NASA publikoi një imazh të bërë nga ekuipazhi i Artemis që tregonte një Hënë të largët me pellgun Orientale të dukshëm. “Ky mision shënon herën e parë që i gjithë pellgu është parë me sy njeriu”, tha agjencia hapësinore amerikane.