Të gjitha qeveritë kanë premtuar rritje pensionesh, por ajo që ka ndodhur për vite me rradhë është vetëm indenksimi i tyre. Indeksimi i pensioneve është një detyrim ligjor që çdo qeveri ka për të kompesuar moshën e tretë në raport me indeksimin e çmimeve. Sipas të dhënave të Instat nga 2013 e deri sot pensionet janë rritur me 8.2 për qind. Por edhe pse indeksimi është bërë çdo vit sa reale ka qenë kjo rritje? Në 1 tetor 2016, kryeministri Edi Rama do të deklaronte se do të rriste pagat e pensionet, duke u shprehur se do i rriste më shumë se qeveria paraaardhëse në çdo vit të saj. Sipas të dhënave të INSTAT në këto vite pensioni mesatar në qytet është rritur me 2.178 lekë në muaj dhe pensioni mesatar në fshat është rritur me 1700 lekë në muaj. Të dhënat tregojnë se në qytetet rritja e pensioneve ka qenë mbi inflacionin, por jo sa dyfishi i tij, ndërsa në fshat kjo rritje rezulton të jetë sa dyfishi i inflacionit. Pra, rritja e pensioneve në vlerë nominale, sa ka qenë reale si fuqi blerëse, në dekadën e fundit? A janë rritur pensionet gjatë kësaj periudhe më shumë apo me pak se ç’janë rritur çmimet? A mund të blejnë pensionistët më shumë produkte e shërbime? Edhe pse indeksimi ka rritur me afërsisht 15 për qind pensionet nga ana tjetër edhe çmimet janë shtrenjtuar nga viti në vit, fenomen që njihet ndryshe me termin inflacioni i çmimeve. Pra, me lekët e djeshme sot mund të blesh më pak. Ndërsa bonuset e fundvitit për pensionistët kanë qenë gjithmonë në vitet zgjedhore më shumë se vitet e tjera. Nëse vitet e tjera pensionistët kanë marrë një bonus 3 mijë lekë në vitet zgjedhore kanë marrë nga 5 mijë lekë. Formula e indeksimit të pensioneve ndryshoi në pranverën e 2023-shit, kur në prag të zgjedhjeve vendore qeveria e transferoi për në tetor. Por ajo ju dha pensionistëve një bonus, nga mbledhja e taksës nga kompanitë e mëdha energjetike.