Socialistët zhvilluan në 8 dhjetor Kongresin e tyre të Jashtëzakonshëm të partisë. Jo rastësisht demokratëve iu rrëmbye një datë simbol që lidhej me protestat kundër regjimit komunist, për t'i dhënë Partisë Socialiste ngjyrat e një përfaqsimi që i tejkalon atë të fanatikëve dhe militantëve tradicional. Për 138 minuta në fjalimin e tij Edi Rama bëri përpjekje për të thënë shumçka, ku kryefjalë dhe pa mungesë modestie kreu i socialistëve u ndal tek drejtësia e re. I kujtoi edhe një herë bashkëpunëtorëve të tij çfarë është një karrige pushteti dhe cilat janë pasojat kur keqkuptohet. Dhe në fakt, SPAK gjatë zhvillimit të Kongresit të PS kishte prerë plot 15 urdhër arreste për zyrtarë të lartë të Bashkisë se Tiranës, si dhe ish-zyrtarë të Ministrisë së Mjedisit dhe komisionit të koncensioneve, arrestime që u ekzekutuan mbrëmjen e vonë të së premtes. Por qetësinë e socialistëve, Edi Rama zgjodhi ta prish paraditën e sotme në mbledhjen e grupit parlamentar, ku neglizhencës së deputetëve të tij për angazhimin politik në Kuvend iu përgjigj me paralajmërimin se për atë vetë opsioni i zgjedhjeve të parakoshme nuk është i pamundur. Por çfarë ndodhi në 72 orë në Partinë Socialiste? Përse ndryshuan tonet dhe gjuha e kryeministrit me socialistët? A është paralajmërimi për zgjedhje të parakoshme një kërcënim i momentit për kryesocalistin apo opsion real politik?