Zjarri apokaliptik përfshiu kompleksin e banimit në afërsi të QSUT, duke shkrumbuar 33 apartamente dhe orendi shtëpiake e duke lënë në rrugë banorët. U deshën vetëm pak minuta që gjithçka të shkatërrohej teksa zjarrfikësve iu deshën orë të tëra për të shuar flakët. Fatmirësisht nuk pati dëme në njerëz, vetëm të lënduar të cilët morën ndihmën mjekësorë në spital. Zjarri la pas gjithçka të shkatërruar dhe një ndërtese për të cilën kryeministri Edi Rama tha përmes një postimi në rrjetet sociale se kompania do e ndërtojë nga e para. Edhe vetë kompania Arlis ka reaguar duke thënë se objekti është ndërtuar në përputhje me lejen e ndërtimit dhe punimet e kryera në godinë janë kontrolluar dhe certifikuar nga organet kompetente. Megjithatë merr përsipër përgjegjësinë për rindërtimit e plotë të fasadës dhe apartamenteve të dëmtuara. Shkaqet zyrtare janë ende në hetim, por policia ka arrestuar katër persona dhe ka nisur hetimet dhe për ndërtuesin. Të arretuar janë administratori i pallatit, menaxherja e marketit në katin e parë të kompleksit, jashtë të cilit dyshohet se nisi zjarri, administratori që ka bërë punimet për fasadën e kompleksit dhe inxhnieri i punimeve. Të gjithë për vepreën penale shkelje të rregullave mbrojtsëse në punë. Për dy punonjëse të marketit dhe menaxheren rëndon dhe akuza e shkatërrimit të pronës nga pakujdesia. Sa të sigurtë jemi brenda shtëpive tona?