Fjalimet zgjatën më pak se sa dhuna në protestën e të shtunës të Partisë Demokratike. Sulmet ndaj kryeministrisë dhe Kuvendit u shoqëruan me përplasje të deputetëve demokratë dhe policisë. Vetë kreu i Partisë Demokratike Sali Berisha, u largua drejt selisë blu pasi mbaroi fjalën e tij ndërsa bulevardi u kthye në arenë përplasjesh mes molotovëve të protestuesve dhe gazit lotsjellës të policisë. Kësaj të fundit nuk i shpëtuan as gazetarët të cilët raportuan nga terreni të përlotur nga përdorimi i gazit, që për ironi të fatit rezultoi të ishte i skaduar që në vitin 2023. Pas Kryeministrisë tensioni u zhvendos drejt Kuvendit, ku mjaft i ashpër ishte dialogu mes deputetëve demokratë dhe policisë. Rezultati i 24 janarit ishte 11 efektivë policie të plagosur dhe dhjetëra të shoqëruar në komisariate. Por teksa për Berishën vijon të jetë nisja e rrëzimit të kësaj qeverie, për Edi Ramën ishte sulm ndaj institucioneve me mercenarë me lekë nga rrugaçët. Sali Berisha tha se protestat do të vijojnë, por as datë dhe as formë teksa u nis për në Strasburg, në mbledhjen e Asamblesë Parlamentare të Këshillit të Europës. A ishte 24 janari një skenar i përgatitur dhune, apo i doli jashtë kontrollit kreut demokrat? Kush janë përgjegjësit e përshkallëzimit të situatës? Si do të vijojë aksioni opozitar?