Me konfliktin në Lindjen e Mesme që nuk jep shenja qetësimi, është shtuar frika e një zgjerimi të tij. Ajo që filloi si një valë sulme nga SHBA dhe Izraeli ndaj regjimit të ajatollahëve, tani është shndërruar në një nga krizat gjeopolitike më serioze të dekadave të fundit, me pasoja që shkojnë përtej kufijve të rajonit. Dhe e rrezikuar nuk është vetëm Lindja e Mesme. Mjaft vende janë renditur krahë Shteteve të Bashkuara të Amerikës, teksa të tjerë nuk e mbështesin luftën. Një prej këtyre vendeve është Spanja, të cilën Trump e ka kërcënuar se do të ndërpresë marrëdhëniet tregtare me të. Kryeministri i Spanjës, Pedro Sánchez, ka mbrojtur publikisht qëndrimin e qeverisë së tij kundër bombardimit të Iranit. Ai argumentoi të mos përsëriten gabimet e të kaluarës, duke kutjuar pushtimin e Irakut në 2003, që solli pasiguri dhe përkeqësoi situatën. Kjo është përplasje e fundit diplomatike e SHBA me vendet e BE, ndërkohë që më herët edhe Britania e Madhe nuk ka dashur të përfshihet në luftë dhe pse forcon operacionet mbrojtëse dhe interesat strategjike. Vetë Trump sulmoi publikisht Starmer duke e quajtur të padobishëm dhe duke konfirmuar përçarjen duke e konsideruar se "marrëdhënia nuk është më e njëjtë". Teherani kërcënoi të hakmerret kundër këtyre vendeve me sulme në tokën evropiane. Paralajmërimi i Iranit vjen në një kohë kur qeveritë evropiane përpiqen të përcaktojnë rolin e tyre në një konflikt në rritje në Lindjen e Mesme, duke peshuar kërkesat e SHBA-së për mbështetje ushtarake kundër frikës së përfshirjes direkte në luftë.