Kërkesa e magjistratëve për rritje pagash është kthyer në debatin e ditës mes organeve të drejtësisë dhe kryeministrit Edi Rama. Të hënën kryeministri foli në rrjetet sociale pas publikimit të regjistrimit të seancës ku gjyqtarët flisnin hapur për kërkesën e tyre për rritje page. Shoqata e Gjyqtarëve e komentoi këtë qëndrim të kryeministrit Edi Rama duke u shprehur se ata “nuk mund të heshtim përballë përbaltjes kryeministrore, publike, mediatike, që synon të ndezë kundërshtitë në opinionin publik për një vendimmarrje dhe proces kushtetues”. Këtë të mërkurë institucionet iu përgjigjën flakë për flakë njëri tjetrit. Rama, theksoi sërish se kërkesa e tyre është e pajustifikueshme, është e papranueshme dhe është e pagëlltitshme për t’iu imponuar Parlamentit dhe qeverisë përmes pushtetit gjyqësor. Edhe Shoqata e Prokurorëve të Republikës së Shqipërisë reagoi publikisht duke theksuar se debatet publike për çështje që lidhen me sistemin e drejtësisë duhet të zhvillohen në mënyrë të përgjegjshme. Sipas tyre çdo formë retorike që synon të kthejë opinionin publik kundër magjistratëve nuk i shërben forcimit të shtetit të së drejtës. Por dhe ata nuk mbetën pa përgjigje nga kryeministri. Në këtë debat në distancë, u përfshi edhe kreu i opozitës Sali Berisha i cili pranon se qeveria ka të drejtën ekskluzive për të rritur pagat e magjistratëve, por lëmshin sipas tij e bëri vetë Rama. Gjyqtarët kanë çuar kërkesën e tyre për rritje page në Gjykatën Kushtetuese, në një kohë kur përplasjet publike mes palëve janë shtuar. Sa cenohet ndarja e pushteteve? A është kërkesa për rritje të pagave të magjistratëve 'molla e sherrit' e radhës mes kryeministrit dhe sistemit të drejtësisë?