21 komisionerë zgjedhorë dhe 1 qytetar u vunë në pranga mbrëmjen e së hënën në zonën e Tiranës dhe Durrësit, në funksion të hetimeve të dosjes 339. Sipas Prokurorisë së Posaçme SPAK, ata rezultojnë të jenë të përfshirë në krime zgjedhore në zgjedhjet e përgjithshme të vitit 2017. 7 komisionerë janë të PS , 3 të LSI, 8 komisionerë të PD dhe 3 të Partisë Republikane. Këta komisionerë kanë qenë në detyrë në tre qendra votimi, dy në fshatin Rubjekë, dhe një në fshatin Shetel, në Shijak. Sipas SPAK, në qendrën e votimi në Shetel, ata kanë lejuar me dashje persona të tjerë të cilët janë paraqitur pranë tyre dhe kanë votuar në emër të votuesve të tjerë. Prokuroria e Posaçme thotë se ka provuar se në këtë qendër votimi është votuar për 22 persona të cilët nuk kanë qenë në Shqipëri, ditën e zgjedhjeve.