Korrupsioni vijon të përmendet si një pikë problematike për Shqipërinë në raportin e fundit të Departamentit Amerikan të Shtetit mbi të drejtat e njeriut. Një problem i përmendur edhe në raportet e viteve të kaluara. Për Shqipërinë, presioni politik, frikësimet, korrupsioni dhe burimet e pakta kanë bërë që sistemi i drejtësisë të mos funksionojë “tërësisht, në mënyrë të pavarur dhe me efikasitet”. Ndonëse kushtetuta parashikon një gjyqësor të pavarur, “presioni politik, frikësimi, korrupsioni dhe burimet e kufizuara e penguan gjyqësorin të funksiononte plotësisht, në mënyrë të pavarur dhe efikase”, thuhet në raport. DASH përmend korrupsionin në qeverisjen e vendit dhe median e lirë por jo të pavarur si problemet kryesore në drejtim të respektimit të të drejtave themelore të njeriut në Shqipëri.