Celibashi tregon si votohet / Vota e pavlefshme nëse e ndan mes partive dhe kandidatëve të ndryshëm

Në emisionin më të ri në Top News “Breaking” të Sidorela Gjonit, Kryekomisoneri Ilirjan Celibashi sqaroi mënyrën sesi duhet të votojnë votuesit. “Ti mund të zgjedhësh vetëm partinë dhe asnjë kandidat dhe vota është e vlefshme ashtu sikurse mund të zgjedhësh vetëm një kandidat dhe kjo fletë votimi është e vlefshme dhe vota shkon edhe për kandidatin dhe partinë. Në çdo rast votuesi ka të drejtë të zgjedhë vetëm 1 parti apo koalicion zgjedhor dhe të shprehë preferencë vetëm për 1 kandidat , dhe jo më shumë”, tha Celibashi. Sidorela Gjoni– Si do cilësohet kjo një fletë e pavlefshme? Celibashi-Nëse zgjedh një parti apo koalicionin dhe kandidat të një partie apo koalcioni tjetër. Pra, nuk mund të zgjedhë partinë ose një koalicion dhe kandidatin të një partie apo koalicioni tjetër. Kryekomisierioni bëri me dije se me miratimin e modelit me numra merr fund edhe shqetësimi i kompanisë sllovene që ka fituar tenderin për prodhimin e fletës së votimit. Celibashi– Pas vendimit të djeshëm që miratoi një fletë me numra procesi është më i thjeshtë në kuptim edhe të dimensioneve të fletës së votimit që i krijon mundësi kompanie që ta bëjë këtë proces në kohën e duhur. Preferencë për kandidatin nuk është risia e vetme për këto zgjedhje. Kompania Smartmatic dërgoi sot në rezervat e shtetit 5. 500 pajisjet që do të shërbejnë për identifikimin biometrik të zgjedhësve. Nga kjo sasi 100 pajisje mbërritën në KQZ për tu përdorur në trajtimin e komisionarëve.