SPAK ka hapur hetime dhe ka çuar në gjykatë kryebashkiakë dhe ish-kryebashkiakë, një fenomen që prek më shumë se gjysmën e bashkive në Shqipëri. Nga 61 bashki 36 kanë pasur të paktën një zyrtar lokal të përfshirë në procedura penale pranë SPAK-ut. Rasti më i fundit është ai i kryebashkiakes së Lushnjes Eriselda Sefa. Gjykata kundër korrupsionit dhe krimit të organizuar ktheu për hetim një çështje gjyqësore ku Sefa akuzohet për mos paraqitje të dokumentacionit të plotë për një dhënie me qera të ambienteve publike. Edhe kryebashkiaku i Vaut të Dejës, Kristian Shkreli është paraqitur në SPAK në këtë fillim tetori. Pak muaj më parë, në prag të zgjedhjeve të 11 majit, Shkrelit ju sekuestrua telefoni celular. Shkreli është i dyshuar për veprën penale të korrupsionit zgjedhor. Edhe kryetari i bashkisë së Kolonjës Erion Isai është marrë i pandehur në SPAK për shkelje të barazisë në tendera. Aktualisht, pas hekurave ndodhet kryebashkiaku i Tiranës Erion Veliaj.