Ka shkuar në tre numri i personave të arrestuar për vrasjen e Hekuran Billës, i cili u qëllua me breshëri, mbrëmjen e 11 qershorit pranë Komunës së Parisit, në Tiranë. Të premten, në pranga ra Adjola Lakra, 26 vjeçe, banuese në Tiranë, e cila dyshohet se ka bashkëpunuar me Viktor Markun dhe Sebastian Malin, dajë e nip, të dy me arrest në burg për vrasjen e Billës. Burime nga policia bëjnë me dije për Top Channel, se 26 vjeçarja Lakra është përdorur si karrem nga Sebastian Mali. Ka qenë pikërisht ajo e cila kishte krijuar njohje me Hekuran Billën dhe mbrëmjen e ekzekutimit, kishte lënë takim me këtë të fundit pranë qendrës tregtare aty ku edhe ai u qëllua.