Wake Up/ Mali i Zi publikon emrat të infektuarve me korona. Debat për shkelje të privatësisë

Mali i Zi ka publikuar të dhënat e plota të pacientëve me korona në faqet e saj zyrtare. Po ashtu, qeveria po përditëson vazhdimisht në mënyrë publike të dhënat e atyre personave që duhet të jenë të izoluar. Kjo është vendosur nga Grupi Koordinues Kombëtar për Sëmundjet infektive në Mal të Zi. Qeveria malazeze thotë se “duhet që çdo qytetar ta dijë se kush janë ata persona të padisiplinuar dhe që nuk i respektojnë masat dhe udhëzimet për vetizolim, pasi me lëvizjen e tyre ata po rrezikojnë fqinjët apo personat e tjerë”. Qeveria malazeze ka thënë se ky vendim është ndërmarrë pasi kanë marrë shumë njoftime që personat që duhet të ishin në vetizolim për shkak të kontaktit me persona të infektuar nuk po e respektojnë këtë masë, dhe po paraqesin rrezik të lartë për të gjithë popullin malazez. Sqarohet se ky vendim është marrë në mënyrë unanime, me bindjen se jeta dhe shëndeti i qytetarëve është detyra kryesore. Autoritetet kanë bërë thirrje që qytetarët t’u dalin në ndihmë personave që janë në vetizolim. Qeveria në faqen e saj zyrtare ka publikuar një link, ku po publikohen emrat dhe vendbanimi i personave që kanë marrë urdhër të qëndrojnë në vetizolim.