Ujvarat e Baldushkut janë një prej mrekullive që ofron natyra e zonave rurale pranë Tiranës. Ato gjenden në rrjedhën e sipërme të lumit Zhullimë që përshkon luginën e Baldushkut, në afërsi të fshatit Kakunjë. Natyra ka punuar në këtë vend për mijëra vite dhe është kujdesur për ti fshehur ujvarat mes shkëmbinjëve dhe gjelbërimit të dendur. Por nuk ka arritur ta mbajë sekretin përgjithmonë. Sot ato janë një prej atraksioneve kryesore për guidat turistike për kryeqytetasit.