A po shkon bota drejt skenarëve apokaliptikë? Ndërsa tensionet mes fuqive të mëdha rriten, teksa Irani, Izraeli, Rusia, NATO dhe Kina luajnë në prag të një zjarri global, shumë sy janë kthyer jo vetëm nga ekranet e lajmeve, por edhe nga librat e shenjtë. Në këtë botë që po dridhet mbi butonin e kuq, pyetja që del natyrshëm është: A është kjo ajo që është parashikuar mijëra vite më parë? Bibla dhe Kurani, ndonëse të ndara në kohë dhe stil, ndajnë një gjuhë të përbashkët kur vjen puna te fundi i botës: përshkrime të errësirës, shpërthimeve, gjëmimeve dhe një fundi që trondit edhe imagjinatën. Ato nuk përmendin drejtpërdrejt “bombën atomike” apo “luftën bërthamore”, por pasazhet që përshkruajnë përmbysje të tokës dhe qiejve janë sot më aktuale se kurrë. Në Zbulesën e Gjonit, një e treta e njerëzimit zhduket nga zjarri dhe tymi; në Zekaria, mishi u shkrin njerëzve në këmbë. Nuk janë pak ata teologë modernë që e lexojnë këtë si paralajmërim për një katastrofë të shkaktuar nga dora e njeriut, një luftë bërthamore.