Një ngjarje në kufijtë e një akti të pastër terrorist tronditi kryeqytetin mbrëmjen e të dielës. Një breshëri plumbash, pa paralajmërim u lëshuan drejtë një lokali në zonën e Don Boskos në kryeqytet, ku si pasojë humbi jetën 58 vjeçarja Mimoza Paja dhe u plagosën 6 shtetas, mes të cilëve edhe një vajzë e mitur, mbesa e viktimës së kësaj ngjarjeje të rëndë. Viktima punonte si banakiere prej pak kohësh në lokalin ndaj të cilit u lëshuan 15 plumba kallashnikovi dhe nuk kishte asnjë lidhje me objektivat real të atentatorëve. Lokali rezulton të jetë në pronësi të shtetasit Fatjon Murati, një emër shumë i njohur për drejtësinë për shkak të procedenteve të theksuar penal, si person i dyshuar për disa krime. Gjatë momentit të goditjes me armë në drejtim të biznesit të tij, Murataj nuk gjendej aty, pasi prej vitit të kaluar me vendim gjykate Murataj ishte nën masën arrest shtëpie. Por atentatorët shenjestruan familjarët e Muratajt duke plagosur xhaxhain tij dhe katër shtetas të tjerë, teksa vëllai dhe kushëriri nuk pësuan lëndime. Pas ngjarjes në afërsi të fshatit Bubq autorët braktisën makinën tip “BMË”, së bashku me armët e krimit në të dhe i vunë flakën. Makina e djegur që u gjeta nga policia rezulton e vjedhur para 2 vitesh në Durrës. Pas ngjarjes, Policia ishte në shtëpinë e Fatjon Muratajt ku ai do të duhej të ishte duke qëndruar për shkak të masës së arrestit të shtëpisë, por ky i fundit rezulton të jetë arratisur.