Një grup zhytësish shqiptarë dhe polakë kanë çelur sezonin turistik të zhytjeve sportive për vitin 2021 në burimin e Mëmës,në liqenin e Viroit, në Gjirokastër. Burimi sapo ka rihyrë në shtrat pas përmbytjeve të ditëve të fundit. Ujërat nuk ofrojnë ende qartësi dhe rrymat nënujore janë shumë të forta por sipas zhytësve ky është një sport adrenaline për profesionistët nga e gjithë bota. Dimri shqiptar po kthehet në një stinë ideale edhe për spileologët e nën ujit. Ekipi i zhytësve polakë ka udhëtuar në rrugë tokësore përmes disa shteteve për të realizuar zhytje në disa burime në Jug të Shqipërisë ku Viroi është më i rëndësishmi. Ata kanë kaluar barrierën e disa kufijve për shkak të protokollit të Covid 19 por janë të bindur se këtë vit udhëtarët e sporteve të natyrës nuk do të qëndrojnë në shtëpi. “ Unë jam Marta nga Polonia, jam instruktore zhytjesh dhe kjo është hera ime e parë në Shqipëri. Nuk e dija çfarë të prisja kur erdha. Kam parë fotot dhe videot nga shpellat por sot qartësia është e dobët, jo më shumë se 2 metra dhe rryma shumë e fortë. Megjithëse i përdorëm të gjitha peshat për të shkuar poshtë ishte e pamundur kështu që do të më duhet të vij përsëri”. Shpellat nënujore të burimit të Mëmës të eksploruara vetëm disa vite më parë nga zhytësit polakë shkojnë deri në thellësinë 295 m dhe kanë një reliev të rrallë. Zhytësit i kanë kthyer tashmë në atraksione të këtij lloji të turizmit edhe eksplorimin e shpellave nënujore të Skotinisë dhe të Petranikut. Gjithë territori i parkut të Viroit me sipërfaqe 17,5 ha është shpallur monument natyre që prej vitit 1982 por ende orientimi turistik i këtij destinacioni gjendet në hapat e parë.