Kreu i Partisë Republikane, Fatmir Mediu duket se nuk ka pritur Partinë Demokratike, por ka nxituar që të prezantojë 36 kandidatët për deputetët në Qarkun e Tiranës për zgjedhjet e 25 prillit. Prezantimi i tyre është bërë në mbledhjen e aktivit të Tiranës. Nga ana tjetër dy forcat më të mëdha të opozitës PD dhe LSI nuk kanë vendosur ende se çdo të bëjë me aleancat. Mbasi një pjesë e madhe e kandidatëve për deputet folën në këtë aktivitet për angazhimin e tyre në çdo zonë zgjedhore në qarkun e Tiranës fjalën e mori Kryetari I PR z Mediu i cili vlerësoi historikun dhe rolin e Partisë Republikane në këto 30 vite pluralizëm dhe më tej theksoj se: Historia e të djathtës është histori njerëzish që e kanë krijuar atë. Nuk mund të ketë sukses një parti politike, një opozitë, në qoftë se nuk do të dijë të vlerësojë, jo vetëm historinë e vet si vlerë e shkruar e historisë , e arritjeve, por sidomos si vlerë e kapitaleve njerëzore që kanë krijuar këtë histori. Prandaj është shumë e rëndësishme që në rrugëtimin tonë për të bashkuar shqiptarët më 25 prill, të bashkojmë në radhë të parë atë që është identiteti politik i të djathtës, të përndjekurit politikë, ata që u persekutuan, pronarët, themeluesit, krijuesit, ideatorët e lëvizjeve demokratike, ata që kanë kontribuar në këto 30 vite, ata që kanë realizuar arritje, ata të cilët janë një potencial i jashtëzakonshëm intelektual, por dhe politik dhe elektoral, jo vetëm për Partinë Republikane, por për Partinë Demokratike dhe gjithë opozitën. Të bashkojmë të gjithë politikën e djathtë, sepse kam bindjen që e djathta, në mënyrë të padiskutueshme, mbart më shumë vlera, në respekt të njerëzve, në respekt të vendit, në respekt të kombit, për t`a bërë Shqipërinë Europiane.