Ministrja Xhaçka priti sot zv.kryeministren dhe Ministren e Punëve të Jashtme të Bosnjë Hercegovinës, Bisera Turković. Ajo tha se të dy palët patën “një bisedë mjaft konstruktive mbi axhendën tonë bilaterale, ku ramë dakord që të vijojmë dialogun politik dhe ta intensifikojmë atë duke rritur kontaktet e nivelit të lartë” “Unë besoj që bashkëpunimi mes Shqipërisë dhe Bosnje Hercegovinës ka një potencial të madh, që ende është i pashfrytëzuar. Ka shumë hapësirë për të krijuar lidhje ende të pashfrytëzuara ekonomike e tregtare, për të rritur investimet por edhe për të rritur shkëmbimet në përgjithësi mes vendeve e popujve tanë”, tha më tej ministrja. Deklarata Ishte një kënaqësi që prita sot në Tiranë, Nënkryetaren e Këshillit të Ministrave dhe Ministren e Punëve të Jashtme të Bosnje dhe Hercegovinës, Bisera Turković, në vizitën e saj të parë zyrtare në Tiranë. E dashur Bisera, mirëserdhe dhe më vjen mirë që pavarësisht kufizimeve që ka krijuar pandemia COVID-19, patëm mundësinë të takohemi personalisht. Ne patëm një bisedë mjaft konstruktive mbi axhendën tonë bilaterale, ku ramë dakord që të vijojmë dialogun politik dhe ta intensifikojmë atë duke rritur kontaktet e nivelit të lartë. E mirëprita vendimin e Bosnje dhe Hercegovinës për të hapur së afërmi një përfaqësi rezidente në Tiranë dhe ndava me zonjën Turković,dëshirën tonë për të reciprokuar në të ardhmen e afërt.