Këtë javë studiuesit në katër vende të botës kanë filluar provat klinike për një qasje aspak të zakonshme ndaj koronavirusit të ri: Ata po testojnë nëse vaksina BCG, kundër Tuberkulozit, mund të rigjallërojë sistemin imunitar të njeriut në një mënyrë të gjerë, duke lejuar që ai të luftojë më mirë Kovidin 19 dhe ndoshta të parandalojë tërësisht infeksionin. A mund të jetë kjo një zgjidhje e ndërmjetme për këtë pandemi, në ndërkohë që ende nuk është prodhuar një vaksinë kundër Kovid 19? Sipas Doktor Sulçebe vaksina e turbekulozit nxit sistemin imunitar edhe pse jo në mënyrë specifike që të mbrohemi nga infeksionet virale. "Ky infekson që ka shkaktuar këtë pandemi ka 3 muaj që po zhvillohet dhe është kohë shumë e shkurtër që në kaq pak muaj të dalë një medikament që të jetë efikas ndaj këtij virusi. Të gjitha medikamentet që po përdoren deri tani nuk janë të sigurta me thënë të vërtetën dhe në këtë kuadër ka dalë në skenë dhe vaksina e turbekulozit e cila përveç mbrojtjes nga turbekulozi duket se bën një nxitje të sistemit imunitar sigurisht jo në mënyrë specifike që të mbrohemi edhe nga infeksione virale. Kjo është një e dhënë që ka dalë në dukje vite më përpara dhe tani ka dalë prapë në pah. Por vaksina e turbekulozit është e detyrueshme për fëmijët e porsalindur dhe dihet që ajo mbron deri në 20-vjeç por në moshat e rritura ajo nuk mbron. Por nga ana tjetër për moshat mbi 60- vjeç të shpresojmë që të kenë rënë në kontakt me bakterin e turbekulozit, i cili ka qarkulluar në vendin tonë para disa viteve dhe që trupi i tyre sot të ketë një kujtesë imunitare në mënyrë imuniteti t'i përgjigjet në mënyrë më efikase virusit Kovid 19. Kjo është një shpresë sepse ne nuk kemi fakte sesi trupi do të reagojë me efikasitet apo jo"- tha Sulçebe.