Myrto Uzuni është njeriu i momentit në kombëtaren shqiptare, pasi 25-vjeçari me ekipin e Ferencvarosh, të cilit iu bashkua vetëm në gusht, ka arritur të realizojë dy gola në Champions League, duke qenë vendimtar në kalimin e ekipit hungarez në fazën e grupeve. I ftuar sot në Wake Up ai ka konsideruar veshjen e fanellës kombëtare si kulmin e karrierës së çdo sportisti dhe që ndjehet shumë i lumtur që arriti të veshe dhe ai fanellën e kombëtares. Por si e gjen ndeshja me Kazakistanin kombëtaren që duket se shkon me shumë mungesa? "Për sa i përket Kombëtares ekipet e tjera kanë kualitet dhe një gol të lumturon shumë. Normalisht mungon një pjesë e mirë e Kombëtares të cilët janë të dëmtuar, për sa i përket Kazakistanit uroj që të fitojmë sepse është mundësia jonë që të jemi të parët në grup. Të rinjtë që kanë ardhur janë me kualitet, uroj që të adaptohen sa më shpejt me ekipin kombëtar dhe të vazhdojnë në këtë rrugëtim. Kushdo që vjen në Ekipin Kombëtar është dyfish i motivuar sepse përfaqëson kombin e tij."- tha Uzuni. I pyetur për përvojën e tij jashtë vendit me ekipet e huaja dhe me çfarë ndodh me futbollin në Shqipëri, ku kohët e fundit është dhe bojkoti i Superligës ai tha: "Me thënë të drejtën në Shqipëri realisht është dyfish e vështirë edhe kur luan por tani në këtë situatë të bojkotit të Superligës është bërë edhe më e vështirë pasi unë kam kolegë në Shqipëri me të cilët kam luajtur që mbajnë familjet e tyre me futbollin. Ndaj uroj që qeveria ti plotësojë kushtet dhe ti kthehemi normalitetit dhe ekipet të kthehen në fushën e lojës"-tha Uzuni.