Një lajm i mirë vjen për psikologët shkollorë, por jo vetëm për ata por edhe për prindërit. Që në pikënisje të Urdhrit të Psikologut vazhdimisht ai ka ngritur si shqetësim numrin e vogël të psikologëve të cilët punojnë në shkolla dhe janë përgjegjës në disa raste edhe për 12 shkolla. Si pasojë edhe e problematikës së ngritur të abuzimeve seksuale, Urdhri ka ndërmarrë një tjetër fushatë sensibilizimi në institucionet përkatëse, për shtim të numrit të psikologëve. Pas kërkesave të vazhdueshme dhe ngritjes së shqetësimit thuajse në çdo dalje dhe prononcim publik, Urdhri i Psikologut shprehet se jemi tashmë në një situatë, e cila pritet të ndryshojë plotësisht dhënien e shërbimit psikologjik në shkolla, si dhe rendimentin në punë të psikologëve. Në bashkëpunim me Ministrinë e Arsimit Sportit dhe Rinisë, Agjencinë e Sigurisë së Cilësisë së Arsimit Parauniversitar si dhe Fakultetin e Shkencave Sociale, Tiranë, është ngritur grupi i punës dhe po punohet për hartimin e fondit të pyetjeve për psikologët, që do të punësohen në shërbimin psiko-social në muajt në vijim. Valbona Treska, presidente e Urdhrit të Psikologut shpjegoi procesin e kësaj riformatimi i shërbimit psikologjik në shkolla që ajo e konsideron shumë të rëndësishëm për sistemin tonë arsimor.