Farmacistët gjatë kësaj kohe janë përballur me shumë probleme. Sipas Dëfrim Gomës, Sekretar i Përgjitshëm i "Urdhrit të Farmacistit", një fenomen që po ndodh aktualisht është se shumë farmacive po ju skadojnë barnat të cilat duhet të tregtoheshin gjatë kohës së pandemisë dhe kjo është një humbje tjetër për farmacitë dhe askush nuk e rimburson. Por çfarë do të ndodhë me barnat e skaduara. A janë qytetarët e sigurt që do të ketë kontroll dhe menaxhim të kësaj situate apo rrezikojmë që këto barna të skaduara, të na shiten? Dëfrim Goma, i "Urdhrit të Farmacistit" shprehet se nuk janë farmacistët ata që inkurajojnë dhe tregtojnë barna apo masa mbrojtëse të skaduara. "Të jeni të sigurt që e gjithë humbja do të jetë e farmacistëve. Farmacistët nuk guxojnë që të shesin një ilaç pasi i ka kaluar afati i përdorimit. Nuk janë farmacistët që po tregtojnë apo kanë inkurajuar njerëzit të përdorin produkte të skaduara. Kemi parë këto kohë të tjera raste ku është inkurajuar përdorimi i materialeve mbrojtëse të skaduara që një farmacist kurrë nuk do ta bënte as në aspektin ligjor, sepse është e ndaluar me ligj, por as në aspektin profesional, sepse i shkakton një dëm personit që e përdor. Publikisht keni parë që është inkurajuar përdormi i maskave të skaduara dhe u është thënë njerëzve që këto maska janë të skaduara por janë të efektshme. Nuk janë farmacistët që i kanë tregtuar ato apo u kanë thënë njerëzve këtë gjë. Unë jam farmacist vetë dhe nuk do ta thoja kurrë një gjë të tillë dhe as nuk do të tregtoja një mall të skaduar. Për ne si farmacistë është e pakonceptueshme dhe e paimagjinueshme që të dilet publikisht dhe të thuhet që kjo maskë është e skaduar por ka efekt. Efekti i çfarëdolloj produkti nuk përcaktohet me deklarata publike por pasi të kryhen analizat laboratorike që ta vërtetojnë se ky produkt e ka akoma vlefshmërinë dhe e mbron personelin shëndetësor nga KOVID-19, pra duhet të flasin specialistët. Por të dalësh publikisht dhe të thuash po e vendos unë këtë maskë të skaduar dhe s'po më gjen asgjë është e pakonceptueshme."- tha Dëfrim Goma, i "Urdhrit të Farmacistit" duke iu referuar në fakt daljes publike të Kryeministrit, Edi Rama i cili pati deklaruar në fillim të marsit se maskat e shpërndara për personelin shëndetësor që nuk është i përfshirë drejtpërdrejtë në frontin e parë në perimetrin e luftës ndaj koronavirusit, mund të përdoren edhe pas datës së skadencës jashtë sallave kirurgjikale.