Ato njihen si motrat Prenga me origjinë nga Rrësheni, të tria volejbolliste profesioniste që e kanë përfaqësuar me shumë profesionalizëm sportin shqiptar kudo që kanë pasur mundësi. Bëhet fjalë për Amarildën e cila është e angazhuar në Tiranë, Arjola që luan në Norvegji dhe Adeladja për ekipin "Drita" të Gjilanit në Kosovë. Këto javë izolimi i kanë ndarë motrat në tre shtete të ndryshme, ndonëse ato janë në komunikim me njëra-tjetra thuajse 24 orë në 24. Duke qënë të angazhuara me sport prej vitesh, edhe gjatë kësaj kohe që janë në shtëpi ato bëjnë stërvitje të rregullt duke shfrytëzuar të gjitha ambientet e mundshme të shtëpisë. Amarilda është më e madhja prej motrave, e martuar me dy fëmijë. Dy motrat e tjera janë po ashtu të fejuara dhe jetojnë me partnerët e tyre përkatësisht në Norvegji dhe në Kosovë. Adelalda është e vogla e familjes dhe prej rreth 6 vitesh jeton në Kosovë. Arjola, një ndër volejbollistet më të spikatura shqiptare, jeton në Norvegji, është ish kapitene e kombëtares dhe pjesë e ekipit të Rrëshenit. Ndonëse është larg ajo mundohet që të vijë 1 herë në muaj në Tiranë, pasi edhe luan për ndeshjet më të forta. Këtë mëngjes ishim në shtëpitë e tyre, ato ishin zgjuar herët dhe bëmë bashkë edhe stërvitjen e parë të mëngjesit.