Mëngjesin e sotëm në “Wake Up” ishin të ftuar “Tre Muskëtjerët”, kantautorët Aleksandër Gjoka, Elton Deda dhe Redon Makashi të cilët prej 8 muaj e gjysmë po vujanë pasojat e pandemisë. Përgjatë bisedës në “Ëake Up” ata zbuluan se po punojnë për albumin e tyre, duke sjellë këngë dhe rikompozime ndër vite. Sipas tyre e vetmja gjë e mirë nga pandemia është fakti që iu ka dhënë kohë për të punuar më shumë bashkë dhe për të përzgjedhur tekstet që do të punojnë për albumin e tyre të parë. “Kemi bashkuar këngët tona ku do të sjellim kompozime të reja. Ky do të jetë albumi ynë i parë” – tregoi Redoni. Më tej Aleksandri tha: “Ky është një album ndryshe, nuk është albumi im, i Tonit apo Redonit. Në fillim punuam tek shtëpia e Tonit dhe më pas në Voskokpojë. Kjo është praktikë botërore dhe do kohë të punohet. Vështirësia e këtij albumi është përzgjedhja e këngëve, sepse secili prej nesh ka këngë të vetat. Do të zgjasë publikimi i albumit, pasi duam ta punojmë tamam”. Ndër të tjera Eltoni theksoi: “Ka një proces i cili nuk duhet anashkaluar. Fatkeqësisht pas viteve 2000 u mësuam të bënin nga një album në ditë dhe 10 këngë në ditë, ashtu u katandis muzika jonë. Ky nuk do jetë një album konsumi, por me jetëgjatësi. Nuk mund të themi një kohë fikse pasi albumin duam ta incizojmë në Larisa, Greqi dhe kufijtë janë të mbyllur. Nga pranvera do jemi gati për të regjistruar, pasi besojmë se dhe pandemia në mënyrë graduale do ketë përfunduar. Ne po punojmë këngët që t’i perfeksionojmë”.