Mësimi i gjuhëve të huaja nga të rinjtë shqiptarë është në një tendencë gjithmonë e në rritje. Arsyet janë nga më të ndryshmet, por ajo që i çon më shumë të rinjtë drejt mësimit të tyre janë kërkesat e vazhdueshme të tregut të punës apo lëvizja e lirë e qytetarëve drejt shteteve të ndryshme. Shumë prej të rinjve zgjedhin tu drejtohen kurseve private, por ka shumë të tjerë që mendojnë t'i perfeksionojnë këto gjuhë, duke ndjekur edhe arsimin e lartë, kurset që ofrohen brenda fakulteteve. Po çfarë gjuhësh të huaja zgjedhin të studiojnë më shumë shqiptarët? A vazhdon të jetë në majën e preferencave, anglishtja, gjermanishtja apo frëngjishtja? Sipas Prof. Dr Artur Sula, Dekani i Fakultetit të Gjuhëve të Huaja në Universitetin e Tiranës tha se ajo që vihet re kohët e fundit është se të rinjtë shqiptarë po priren të mësojnë edhe gjuhë të huaja jo shumë të përhapura, gjuhë që ju përkasin shteteve me kultura të ndryshme nga ajo e shqiptarëve. Hebraisht, arabisht, polonisht, apo edhe gjuhë të vendeve aziatike janë disa nga prirjet më të reja të rinjve shqiptarë, ndërkohë që gjuhë që dikur ishin të përfshira masivisht në kurrikulat mësimore, p.sh gjuha ruse është drejt zhdukjes.