Gjithmonë e më tepër kompanitë e mëdha botërore po punojnë që të shfrytëzojnë të gjitha format e teknologjisë për të ndihmuar qeveritë në frenimin e përhapjes së virusit. I tillë është edhe rasti i "Apple" dhe "Google", të cilat po zhvillojnë së bashku një aplikacion të ri për të njoftuar njerëzit përmes celularit nëse kanë rënë në kontakt së fundmi me persona të infektuar. Në muajin maj, "Apple" dhe "Google" do të bëjnë të disponueshme të dhëna konkrete për inxhinierët që po projektojnë aplikacionin për institucionet botërore, i cili do të lejojë dialogun dhe ndërveprimin midis pajisjeve Android dhe IOS. Metoda e tyre e gjurmimit të kontakteve do të funksionojë duke përdorur sinjalet Bluetooth të një smartphone për të përcaktuar se kush është pronari i këtij të fundit, i cili ka qëndruar mjaftueshëm afër me dikë, aq sa mund të rrezikojë infektimin. Nëse një prej atyre njerëzve më vonë testohet pozitiv për virusin Kovid-19, një paralajmërim do t'i dërgohet pronarit të celularit. Kjo formë e teknologjisë do të ruajë anonimatin e personave që e shkarkojnë këtë aplikacion. Privatësia është një ҫështje e diskutuar këto kohë pasi për shkak të kuriozitetit në klikojmë në shumë site apo adresa që servirin informacione për këtë virus. Po ashtu edhe në rrjetet sociale na vijnë herë pas here njoftime me emrin "Kovid 19". Dhe natyrshëm na lind pyetja se sa të rrezikuar jemi?