Disa emërtesa gjeografike të Shqipërisë që prej kohës kur Google futi hartat e të gjithë globit, ishin hedhur gabim. Në shumë raste ato ishin emra ashtu siç i shqiptojnë fqinjët tanë, grekët, maqedonasit apo malazezët. Por një iniciativë interesante e Ministrisë për Evropën dhe Punët e Jashtme, ka bërë që Google të reflektojë. Kompania i është përgjigjur pozitivisht kërkesës së ministrisë sonë për korrigjimin e 41 pasaktësive të publikuara në platformat Google Map dhe Google Earth, lidhur me emërtesat gjeografike të relievit shqiptar, të cilat bien ndesh me hartën e Republikës së Shqipërisë. Agron Tare, Zëvendës Ministër në Ministrinë për Evropen dhe Punet e Jashtme tha se edhe pse jemi të vonuar e rëndësishme është që tashmë këto gabime u korigjuan. "Për të qenë i sinqertë kjo që ka ndodhur ka dhe pak natyrë gjeo-politike nuk është një gjë kaq naive dhe kaq e thjeshtë. Ne nuk bëjmë lobim për të ndryshuar edhe pjesët evazhdimisë së të njëjtit reliev edhe matanë lufijve, ne kërkuam që pjesët e këtij relivei brenda kufijve shqiptarë të njihen me emra shqiptarë Sipas Autoritetit Shtetëror për Informacionin Gjeohapësinor, në Shqipëri ka emërtesa për Qytete-Fshatra 3056; emërtesa për pika Relievi 9926 (ara, fusha, bishta, brigje, brinja, bunishta, çuka, faqe, fusha, gropa, gryka, gurra, hauze, hije, ishuj etj) dhe emërtesa të Hidrografisë 5157 (përrua, liqen, ujëmbledhës, rezervuar, lumë, kanal etj). Të gjitha këto emërtësa do të verifikohen sidomos sidomos emërtesat gjeografike kufitare që mund të ketë mes tyre emërtesa në gjuhë të huaj që do duhet të korrigjohen.