Marrëdhënia që ne shqiptarët kemi me besimin fetar është komentuar në çdo kohë. Duket sikur vit pas viti interesi për fenë rritet e kjo gjë vihet re edhe tek moshat e reja. Të dhënat e një studimi të fundit tregojnë se 14 % e të rinjve shqiptarë të moshës 15-35 vjeç, e praktikojnë fenë çdo ditë. Ndërsa pjesa më e madhe e të pyeturve, rreth 70 % ose nuk e praktikojnë aspak fenë përveçse në raste festash fetare. Studimi është realizuar nga Komiteti Shqiptar i Helsinkit me mbështetjen e Ambasadës së Mbretërisë së Vendeve të Ulëta në Shqipëri. Tre boshtet kryesore të këtij studimi janë: Liria e besimit mes të rinjve në familje dhe komunitet; Situata e edukimit mbi liritë fetare në institucionet arsimore; Perceptimi i të rinjve rreth radikalizmit dhe ekstremizmit. Rezulton se 55% e të rinjve të anketuar, i përkasin besimit Islam, ndjekur nga 14% të besimit katolik dhe 12% të besimit ortodoks. Ndërkohë, 15% e tyre janë tregojnë se nuk i përkasin asnjë besimi. Studimi në fjalë ka për qëllim që të ulë paragjykimet për fenë e tjetrit dhe të nxisë harmoninë mes besimeve të ndryshme fetare. Ҫështja e fesë është gjithmonë e më shumë në vëmendje botërisht, aq më tepër në një kohë kur grupet radikale apo ekstremiste janë aktive dhe veprojnë shpeshherë në emër të saj. Kryesisht në dy dekadat e fundit, Ballkani është shndërruar në një terren të favorshëm për depërtimin e ideve radikale dhe ekstremiste islamike dhe për eksportimin e terrorizmit islamik në Evropë, ndaj jo më kot temat që lidhen me fenë janë aq sensitive. Në Shqipëri radikalizmi fetar ka depërtuar që në vitet e para të tranzicionit përmes fondacioneve islamike, ndërsa është përhapur sidomos gjatë dhe pas viteve 2000 përmes aktorëve fetarë që përgjithësisht kanë qenë jashtë kontrollit të institucioneve zyrtare të fesë.