Studentët zyrtarisht nisin vitin akademik në 2 nëntor, por ata kanë qenë në auditore gjatë gjithë muajve të verës dhe në këtë periudhë sepse kanë mbyllur vitin akademik, i janë nënshtruar provimeve por edhe shërbimeve të tjera të cilat u mbyllën për një periudhë disa mujore si pasojë e pandemisë. Gjatë kësaj kohe të rinjve u është dashur të lëvizin brenda qyteteve, në veçanti në Tiranë ku është i përqendruar dhe numri më i madh i fakulteteve. Për shumë të rinj transporti publik është mjeti kryesor. Por që nga momenti i rihapjes së këtij transporti e deri më sot, ata nuk janë pajisur me abonetë e studentit, një dokument që i lejon ata të përdorin lirshëm linjat e transportit publik e duke ju reduktuar ndjeshëm shpenzimet financiare mujore. Studentët së fundmi kanë nënshkruar një peticion, i iniciuar ky nga "Qëndresa Qytetare" dhe sot ata ishin para Bashkisë së Tiranës për ta dorëzuar zyrtarisht. Ne ishim në një lidhje direkte për të kuptuar diçka më shumë rreth këtij peticioni me Rigels Xhemollari nga "Qëndresa Qytetare" dhe një grup studentësh që kanë nënshkruar këtë peticion.