Disa studentë dhe specializantë shqiptarë në Itali janë bërë bashkë me dëshirën për të ndihmuar sadopak në situatën e krijuar në Shqipëri nga koronavirus. Më konkretisht ata kanë vendosur të ndërmarrin një fushatë për mbledhjen e fondeve për QSUT dhe për strukturat e tjera spitalore rajonale dhe bashkiake. Qëllimi i tyre është që të mblidhen fonde online për të blerë pajisje mbrojtëse personale për stafin mjekësor, ventilatorë, respirator...etj. Duke parë situatën shumë të vështirë që po kalon Italia, studentët shqiptarë u nxitën që të kontribuojnë sadopak për vendin e tyre edhe pse janë në izolim prej dy javësh. Apelin e tyre për këtë fushatë ata e kanë shpërndarë në rrjetet sociale duke ia sugjeruar fillimisht të njohurve të tyre. Në mënyrë që gjithçka të jetë sa më transparente, do të postohen sistematikisht të gjitha detajet! Bazuar në problematikat e sistemit shëndetësor, studentët kanë zgjedhur që të konsultohen me vetë mjekët në Shqipëri, duke përmendur këtu Prof. Dr. Edvin Prifti, Dr. Gentian Stroni dhe Dr. Erion Panajoti. Ne folën sot për këtë nismë përmes skype me Rezarta Kolleshi, e sapodiplomuar në mjekësi, e cila ka dy javë e mbyllur në shtëpinë e saj në Milano.