Kur shifrat e të prekurve nga SarsCov2 vazhdojnë të rriten vazhdimisht në vend, profesionistët e shëndetit rekomandojnë që tek rastet e lehta të cilat zënë gati 90%, mjekimet duhet të jenë lehta, duke u këshilluar vetëm terapitë me vitamina dhe antipiretikë në rastin e temperaturës dhe dhimbjeve të trupit. Në fakt që nga fillimi i pandemisë, farmacitë shqiptare u ndeshën me një fenomen atë të blerjes masive të vitaminave të ndryshme si përgjegjëse për rritjen e imunitetit por edhe të suplementeve të tjerë ushqimore.. Por edhe vitaminat kanë një masë .. Konsumatorët bombardohen me informacione shëndetësore duke u thënë atyre se marrja e dozave të larta të disa vitaminave mund të përmirësojë shëndetin e tyre në shumë mënyra. Sidoqoftë, marrja e tepërt e vitaminave, suplementeve ushqyes mund të jetë e rrezikshme duke sjellë efekte anësore nga më të lehtat që janë diarre, humbjen e peshës, humbjen e oreksit dhe rrahjet e parregullta të zemrës e deri tek dëmet e mëlçisë madje në botë ndonëse të rralla janë raportuar edhe raste vdekjesh nga mbidozimi me vitamina. Por cilat janë ato vitamina që duhet të marrë trupi ynë në këtë periudhë kur ka nisur dhe stina e ftohtë e dimrit, Covid-19 është përhapur në masë e po ashtu edhe virozat e tjera. Cila është masa që duhet të përdorim dhe cilat janë efektet pozitive por edhe anësore që ato mund të sjellin në organizëm? Këtë mëngjes mjekja nutricioniste, Albana Daka dha për publikun e Wake Up, disa këshilla se çfarë vitaminash duhet të marrim në këtë periudhë, sa duhet të jetë sasia sipas grupmoshave. Doktoresha gjithashtu na zbuloi edhe recetën ushqimore për të krijuar një imunitet të fortë përballë virusit Covid-19.