Pra, siç e thamë, pavarësisht se fërgesa është një gatim që konsumohet në gjithë Shqipërinë, ai është specialitet i Tiranës. Sot në Tiranë organizohet për të tretin vit radhazi, duke u kthyer tashmë në traditë, Dita e Fërgesës. Ne ishim në një lidhje direkte me gazetaren tonë Edlira Sulejmani (Tufina), e cila bashkë me të ftuarit e saj na njohë mbi aktivitetet që organizohet sot pasdite ora, 18.00 në Kalanë e Tiranës në këtë ditë. Siç shpjegoi dhe organizatorja Dhurata Thanasi, dita e këtij gatimi tradicional do të jetë një aheng i vërtetë tirons. Fërgesa e Tiranës, ose siç thonë “Tironcit”: “Fërges Tirone”, nuk dihet në fakt se ku i ka rrënjët, por pranohet nga të gjithë se është një pjatë tradicionale, emblemë e kuzhinës autoktone shqiptare. Studiuesit e kanë pasur të vështirë t’i përcaktojnë me saktësi zanafillën si në kohë ashtu dhe në gjeografinë e territorit. Por është fakt që familje si Bakallët, Demnerët, Allajt, Petrelasit, Karajt, Tafajt etj, e kanë gatuar këtë pjatë në “fteret dhe tavat e dheut të tyne” sipas të njëjtës mënyrë. Studiuesi i historisë së artit kulinar, Mondi Kikino shpjegon që fërgesa tiranase, kjo pjatë ndjellëse dhe gjithë shije, ka brenda saj përbërësit kryesorë të gatesave të kohës që e lindi si, t’lynin, ose vajin apo sallon (dhjamin e kafshëve), gjizën, mishin ose mëlçitë e zeza, miellin dhe specin e kuq djegës. Qepët dhe hudhrat, të cilat dhe ato janë pjesë përbërëse e recetës, sipas tiranasve, janë shtuar shumë më vonë, por që tashmë përbëjnë elementët kryesorë të saj. Shumëkush fërgesën e quan dhe tavë dheu, pasi përbërësit e saj pasi fërgohen, vendosen në një tavë dheu dhe futen në furrë “derisa me i dal t’lyni cipër”. Gjithashtu fërgesa tradicionale nuk duhet ngatërruar me “fergesën e verës” siç quhet dhe ndryshe fërgesa e gatuar me speca, domate, djathë të bardhë dhe vezë