Nëse nxënësit nuk do të arrijnë të përfitojnë maksimalisht nga mësimi në distancë, do të kemi nxënës që do ta mbyllin këtë vit akademik (ndoshta edhe tjetrin) me shumë mangësi serioze. Ndaj aktualisht është e domosdoshme që edhe të gjenden urgjent forma që edhe mësuesit të mund t’i përballojnë (pasi jo të gjithë kanë njohuri digjitale). Këtë kupton nëse lexon një sondazh të projektit “Aftësi për Punë”, projekt i Agjencisë Zvicerane për Zhvillim dhe Bashkëpunim në Shqipëri, i zbatuar nga “SwissContact”, që adreson sfidat kryesore në Arsimin dhe Formimin Profesional. Projekti vëren se ka mjaft problematikë në mësimin në distancë; duke nisur që nga fakti se shumë nxënës nuk kanë internet, apo edhe nga fakti tjetër që thuajse të gjithë përdorin celularin, pajisje që nuk është aspak e volitshme për të mësuar në distancë. Rezultatet e sondazhit kanë nxjerrë këto shifra: 89% e nxënësve përdorin celularët për të komunikuar dhe siguruar pjesëmarrje në procesin mësimor dhe një pjesë e madhe e tyre shprehen, në pyetjet e hapura, se kjo është e lodhshme duke qenë se janë të detyruar të shpenzojnë shumë orë përpara celularit. Mungesa e materialeve digjitale është vënë re për 54% të mësuesve, mungesa e internetit për 27% të mësuesve; dhe mungesa e pajisjeve elektronike e infrastrukturë fizike të përshtatshme për 22.4% të mësuesve. Gjithashtu ka rezultuar se fëmijët kanë hasur vështirësi për të kuptuar shpjegimin e mësuesve nga 42% të nxënësve dhe vështirësi për të ndjekur mësimin nga celulari, ndërkohë që 89% e tyre e ndjekin mësimin nëpërmjet celularit