Javët e fundit nga pandemia një situatë të rënduar po përjeton Greqia. Aktualisht shteti grek është në një bllokim total, ndërkohë që sistemi shëndetësor spitalor është i mbingarkuar nga rastet e shumta që shtrohen çdo 24 orë. Sipas autoriteteve shtretërit e disponueshëm për raste serioze po ulen vazhdimisht dhe po i afrohen nivelit “të kuq", ndërkohë që situata paraqitet më e rënduar në Selanik ndërkohë që Athina po shkon drejt një situate të rënduar. Nga ajo që kanë njoftuar autoritetet zyrtare kjo do të jetë një javë vendimtare për të parë ecurinë e kurbës së rasteve të reja por edhe numrin e humbjeve të jetëve për të vendosur nëse do të ketë një shtyrje të lockdown përtej datës 30 nëntor. Si pasojë e kësaj situate, qeveria helene ka vendosur të mbajë hapur nga një pikë kufitare me vende si Shqipëria, Bullgaria dhe Maqedonia e Veriut. Gazetari, Artur Bibe raportoi nga Athina për Wake Up se përveç pandemisë situata është rënduar edhe nga grevat e sindikatave të transportit publik.