Një draft ligj i dedikuar për startup-et inovativ synon dhënien e stimujve për të nxitur shoqëritë e kësaj natyre në vendin tonë duke parashikuar mes të tjerave edhe lehtësim nga disa taksa (vendore) si dhe ngritjen e një agjencie të dedikuar. Projektligji ka për qëllim krijimin i një kuadri rregullator dhe institucional, i cili mbështet dhe favorizon krijimin dhe zhvillimin e bizneseve të reja me potencial të lartë rritjeje, në fushën e teknologjisë dhe inovacionit, të njohura botërisht si startup-e inovative, të cilat realizojnë ide, modele, produkte dhe procese të reja biznesi, të cilat sjellin risi dhe përmirësim të ndjeshëm në çdo fushë të ekonomisë. Ky p/ligj synon të plotësojë boshllëkun ligjor ekzistues, pasi deri më sot, nuk ka pasur dispozita të cilat rregullonin situatat e lidhura me startup-et inovative në vendin tonë. Objektivat që synohen të arrihen përmes miratimit të këtij projektligji dhe zbatimit të tij janë përcaktimi i lehtësirave fiskale, programeve dhe masave që mbështesin startup-et inovative në fazën fillestare të biznesit (periudha e inkubimit) dhe krijimin e një eko-sistemi të favorshëm për to në Shqipëri