Dikur një nuse nuk shkonte te burri nëse në pajën e saj nuk kishte disa jorganë të punuar me dorë. Brezi i nënave dhe gjysheve tona i mban mend e ndoshta mund të ketë prej tyre që ende e mbajnë në shtëpi si relikte jorganin e natës e martesës. Në varësi të ngjyrave, copës beze apo atllas dhe motiveve, jorgani asokohe ishte simbol i pajës së nuseve të reja por dhe mirëqenieje për familjet shqiptare. Por moderniteti e "dënoi" me "vdekje" traditën e punimit të jorganëve. Por muzikanti dhe koleksionisti Ermal Sela, që vjen nga një familje e njohur që zejtarinë dhe veçanërisht nga ajo e traditës së punimit të jorganëve që trashëguan në katër breza. Sot ai ka përmbledhur rreth 200 modele të ndryshme të jorganëve në një libër që vjen jo vetëm me informacione por edhe si një formë katalogu që na njeh më traditën e hershme. Aty shikojmë skica dhe modele nga më të larmishmet, motivet floreale, gjeometrike, simbolet kombëtare apo edhe pagane të qepura me pe mëndafshi mbi atlas. Përveç funksionit mbrojtës, jorganët kishin një rëndësi të madhe për mënyrën se si dukeshin sepse edhe kjo pjesë përçonte mesazhe të rëndësishme. Pas viteve ’90 u zbeh tradita e zejtarisë por shumë nga skicat e dikurshme ruhen akoma me fanatizëm nga familja Sela dhe disa familje të tjera. Pak ditë më parë Ermali realizoi edhe një ekspozitë pranë Kalasë së Tiranës, ku u ekspozuan disa nga fotot ilustruese të jorganëve për t’i kthyer edhe njëherë në vëmendjen e brezit të vjetër por edhe për të zgjuar kuriozitetin e të rinjve. Ai vetë nuk e ka trashëguar këtë traditë por koleksionon me fanatizëm disa nga mjetet e punës që kanë përdorur prindërit apo gjyshërit e tij përpara shumë vitesh.