Nevila Nika, historiane na tregoi për regjistrimin e parë të popullatës shqiptare në vitet '30. "Ky është regjistrimi i parë zyrtar i shqiptarëve. E veçanta është se ky regjistrim u bë për shqiptarët që jetonin në Shqipëri por dhe për shqiptarët e diasporës. Ky regjistrim fatkeqësisht nuk na ka ardhur i gjithi sepse, gjatë luftës ka pasur dhe shkatërrime, kanë humbur disa prej komunave dhe prefekturave, kanë humbur dokumentacionet për regjistrimin e parë. Për kërshërinë e publikut, në këtë regjistrim të parë përveç gjinisë, emrit, mbiemrit atësisë dhe mëmësisë një nga të dhënat interesante është se aty kërkohej edhe Ditunia: Pra çfarë dijesh kishin individët, nëse dinin shkrim dhe këndim dhe cila ishte gjuha e nënës. Një tjetër detaj i regjistrimit asokohe ishin edhe karakteristikat fizike të personit që regjistrohej: i gjatë i shkurtër, me flokë pa flokë, ngjyrën e flokëve, me mustaqe pa mustaqe etj. Pra regjistrimi bëhej me të gjitha detajet e individit. Ky regjistrim për mua është i pari i plotë dhe gjendet në Institutin e Statistikave në Romë"- na zbuloi disa detaje nga historiku i regjistrimit të parë zyrtare të shqiptarëve në kohën e mbretërisë.