Duke filluar nga sot, mbajtja e maskës është e detyrueshme për t’u mbajtur kudo në ambientet jashtë shtëpisë. Dje autoritetet shëndetësore zbardhën udhëzimin se kur duhet të përdoret maska dhe kur bën përjashtim. Sipas ISHP, maska duhet të mbulojë hundën gojën e mjekrën dhe s'duhet të preket kur vendoset. - ISHP tha se “maska ose barriera e fytyrës ndikon në mospërhapjen e Covid dhe spërklave dhe se ajo duhet të shihet si masë plotësuese dhe duhet të zbatohet së bashku me distancën fizike dhe higjienën e duhur. Maska kirurgjikale hidhet në koshin e mbetjes. Maska tekstile duhet të lahet pas çdo përdorimi në 60 gradë celcius”. - “Udhëzuesi mbi përdorimin e detyrueshëm të maskave në ambientet jashtë shtëpisë”, paraqet kriteret e përgjithshme, rregullat dhe përjashtimet për përdorimin e barrierave mbrojtëse (maskave) në ambientet jashtë shtëpisë, me qëllim zvogëlimin e përhapjes së mundshme të COVID-19. - Moszbatimi i kësaj mase do të ketë penalitete sipas Aktit Normativ me 3 mijë lekë për shkelësit për herë të parë, dhe 5 mijë lekë për shkelje të përsëritur. Por le të shohim sot se si po e zbatojnë shqiptarët mbajtjen me detyrim të maskës jashtë shtëpisë. Me një tur lidhjesh direkte, duke filluar me Tiranën, për të vijuar me Shkodrën, Durrësin, Elbasanin, Gjirokastrën dhe Korçën pamë se qytetarët janë ndërgjegjësuar dhe pjesa më e madhe e tyre lëvizin me maska edhe në rrugë.