“Historia e mendimit shqiptar” është libri më i fundit nga studiuesi dhe botuesi i njohur Ndriҫim Kulla. Kjo është një vepër voluminoze (520 faqe), ku tregohet se si ka evoluar mendimi shqiptar si pjesë e pandashme e trashëgimisë kulturore, arkeologjisë, folklorit, kulteve, fesë, letërsisë...etj. Kjo histori zë fill me themelet e krishtërimit dhe e zbulon këtë traditë si pararendësen e humanizmit iliro-arbëror e të transmetuara deri në 1900-n. Kulla, madje zbulon se në Historinë e Mendimit Shqiptar ka një ndikim edhe më të hershëm, para Krishtit, duke e lidhur me vetë gjuhën shqipe. Thuajse 30 vite më parë, ka nisur kurioziteti dhe interesi i botuesit për historinë rreth 2000 vjeҫare të mendimit, duke hulumtuar me detaje në dokumentet që i referohen periudhave të ndryshme kohore. Ky libër mund të konsiderohet një sfidë e madhe për vetë studiuesin, pasi kjo është një punë e vështirë edhe nëse realizohet nga institucionet apo grupe të caktuara interesi, e jo më nga një individ i vetëm. Kulla vendos në librin e tij një histori mendimi që vjen kryesisht nga kontributi i njerëzve të letrave por ekzistencën e mendimit shqiptar ai e sheh të pashkëputur edhe mes shekujve të errësirës osmane. Autori jo vetëm që e sjell mendimin shqiptar në kontekstin historik, por ai vë kufijtë që i përkasin kësaj kulture sipas etapave të ndryshme kohore.